全球首款配備眼球追蹤功能嘅虛擬實境眼鏡FOVE，5月19日正式喺kickstarter集資一星期左右，已經超額完成目標25萬美金，向945位backers籌得34萬美金，暫定出年5月開始發貨。

內置5.8"兼有2560x1440解像力屏幕嘅FOVE，自從發表以來一直都係焦點所在，事關呢款虛擬實境裝置，能夠追蹤眼球運動同埋有頭部追蹤功能，能夠更加準確捕捉視野同焦點，甚至可以還原出肉眼嘅景深，令畫面更加真實。有咗眼球追蹤功能之外，大家玩FPS遊戲時就可以直接用視線瞄準敵人，甚至可以同遊戲內嘅人物眼神接觸，加上FOVE仲支援3D顯示，令臨場感更強。另外，FOVE亦用咗無線設計，大家打機郁來郁去時，就唔怕會被電線影響，更加靈活。

其實除咗FOVE之外，現時VR Gaming呢個市場仲有Oculus、Valve同Project Morpheus，而且幾款產品嘅出貨日期好接近，相信會喺今次E3展出之後，出年就會正式推出，帶動遊戲市面進入一個新世界。