曾經喺kickstarter集資失敗嘅Megabot，喺得到autodesk幫助之後終於完成呢部Megabot Mk II。創辦人之一Gui Cavalcanti話設計Megabot Mk II並唔係為工業或者軍事方向出發，單純係滿足男人嘅浪漫，將二次元嘅機械人變成現實，等大家都可以操作機械人。

Megabot Mk II重5.4噸以汽油推動，可以坐到2個駕駛員。可以發到1kg嘅彩彈，射速為時速160km。破壞力十足，絕對係美式風格。見佢用彩彈都可以一砲打爆部車，你話唔係向軍事方向發展都冇人信啦。Megabot Mk II仲喺影片入面向日本水道橋重工嘅KURATAS宣戰，仲登加埋日文字幕挑機。最鍾意條片尾段話到「we have a giant robot, you have a giant robot. You know it needs to happen. We challenge you to a duel。」約定一年後進行對戰，超級熱血 ！

至於Megabot2嘅挑戰對象係KURATAS，KURATAS由日本水道橋重工喺3年前製造。雖然未正式決鬥，但四腳型嘅KURATAS單係超型駕駛艙已經贏咗，由操控桿到HUD都型到爆，加上仲有Rocket launcher同1分鐘可發射6000發嘅Gatling gun，兼且有埋自動瞄準功能。比起力量型嘅Megabot Mk II，KURATAS就似係技術型。水道橋重工對挑戰未有回應，不過一部KURATAS日本Amazon賣緊1億2000萬yen一部，人地會唔會用部貴嘢陪佢癲都係問題，但以日本人性格，面對挑機點都唔衰得，話唔定會整部更勁出嚟同Megabot Mk II鬥過！