現代樹屋意大利的城市綠洲

文：MenClub 魏文青　　圖：互聯網
POSTED ON 18 Mar 2015

喺香港講環保，其實係一件幾奢侈嘅事－－即係當依家啲路多人到連行都行唔到，你仲話種多兩棵樹落去搞綠化(然後過幾年再斬咗佢)，唔好話啲人未必願意，如果棵樹識講嘢，棵樹都會Say NO！但其實只要比啲心機，綠化唔單止唔係求其種棵樹咁簡單，而且仲幾有型添！就好似意大利都靈市(祖雲達斯與拖連奴嘅所在城市)，就有個完美結合「人」與「綠化」嘅現代樹屋！

呢個由意大利建築師Luciano Pia設計嘅「25 Verde」，乃係一組5層高嘅建築物，主要物料係「鋼」和「樹」。整組建築物喺設計時就已經預留大量空間讓植物生長，單位與單位之間亦有大量半戶外的休閒空間，甚至仲有小水塘和屋頂花園。穿插於建築物內的200棵樹除咗淨化空氣、減低嘈音異味之外，夏天可以遮擋太陽減低室內溫度，冬天時樹木落葉之後又可增加採光，係咪好「先進」呢！

睇到呢到，可能有Gentlemen已經準備去一轉都靈睇睇樓，但係華生又喺時候黎突破盲腸：「講到咁把炮，豪宅黎啦！幾錢呀？」好話啦！呢個位於都靈市「Chiabrera 25」嘅住宅，提供由45平方米(約480平方尺)至250平方米(約2700平方尺)的單位。文青上網求其搵咗個盤，一個179平方米(約1900平方尺)嘅2房2廁連陽台單位，賣緊980,000歐元(約800萬港元)！

又容許我提提你，年頭開售嘅西營盤「星鑽」，實用面積387尺嘅一房單位售價係852.9萬港元，用盡折扣都只不過係750萬到咋！平成50萬喎！意大利又危險又多賊，啲樹又鬼咁惹蚊虫，仲有管理費肯定好貴！況且成二千尺邊住得哂架，緊係買星鑽啦！慳返50萬仲可以買架車添！肯定係咁！！除非唔係！