成日聽人講，十個男人九個滾，剩低一個仲諗緊！但其實容易受誘惑係人嘅天性，重點在於你忍唔忍得住，良心可唔可以好好控制自己嘅慾望，所以出軌呢家嘢，唔係男人嘅「專利」，女人一樣都有機，而且聽唔少身邊男性朋友分享，好多人都試過發現女友有外遇，真係嚇到面都綠埋！

不過正如女仔成日凝住靚仔一定花心，但現實係醜男可能仲花心！識打扮嘅靚女都唔一定會有外遇，有日本網站就話，更多時睇落又乖又純嘅女仔，出軌機會更加大……當然啦～以下「容易出軌女生特徵」嘅資訊信不信由你，都係參考架啫。

容易受人影響
容易受人影響嘅女仔好多時對自己心意都搖擺不定，就算有男朋友，都容易畀人追兩追而動搖，甚至因為唔識拒絕人，所以遇到其他男性嘅猛烈攻勢，會不知不覺間深陷其中。

追求刺激嘅戀愛
有人鍾意細水長流嘅愛情，但有人就鍾意激情，有啲女仔會天生就鍾意喺戀愛中尋求刺激感，對於一段穩定關係會感到乏味，過一排就會想再搵人撩起自己小鹿亂撞嘅心，開始向其他男人出手，去追求刺激同新鮮感。

唔抗拒同男性單獨外出
單獨外出會發生咩事真係好難預計到，如果個男嘅擺明有心，女嘅又冇防範，真係好易可以觸發劇情，特別係加埋「酒」呢個元素，就更加不得了。

習慣搵男生訴苦
打開心扉同男生傾學業、工作、家庭甚至感情問題，好有機會會傾傾下傾到成為密友，覺得對方先係了解自己嘅人，同對方一齊感覺好舒服等等，不知不覺，對方就會變成你女人心目中特別嘅存在。