無論電影拍得幾真實都好，都係拍出嚟架啫～好多嘢都係假架！務求效果好氣氛正去取悅大家架咋，雖然有啲情況幾乎套套戲都咁做，好似用口咬開手榴彈個安全栓、子彈可以射穿個鎖等等，但呢啲通通都係做戲咁做，真實情況又係點？外國網站Chive而家就話你知！（但其實好多我都覺得唔太可信……）

電影︰失蹤24小時先可以報案
現實：只要覺得有唔妥，隨時都可以聯絡警察

（我始終覺得警察會叫我睇定啲再contact佢，失蹤5分鐘應該冇人會理，除非當面綁架）

電影：用哥羅芳可以令人一秒昏迷幾個鐘頭
現實：用哥羅芳需要五分鐘先可以令人陷入昏迷狀態，而且仲會好快就醒返

（冇理由！明明咁多新聞話啲女畀人用哥羅芳迷姦！咁快醒點迷啫！）

電影：雙手開槍好似好型好易
現實：一次瞄準兩個目標其實好難

（鬼唔知一次瞄準兩個目標好難咩……）

電影：法醫可以解答所有迷思甚至係破案
現實：法醫只可以幫手蒐集證據

（呢個唔係常識嚟架咩？！破案嘅明明係柯南！）

電影：可以用子彈射穿個鎖
現實：鎖頭會彈開子彈，唔會射得穿把鎖

（所以戲入面啲人射爆個鎖破門而入都係假架？？）

電影：警察可以透過電話一分鐘內就追蹤到犯人
現實：追蹤電話來源需要約一個鐘

（就算冇一分鐘咁快，應該唔需要一個鐘掛……個犯應該唔會同你傾成個鐘……）

電影：就算個心停咗，都可以用電撃令患者有返心跳
現實：一旦心臟停止跳動，電撃都救唔返

（電擊係將處於顫抖或者不正常跳動嘅心臟恢復去正常跳動頻率）

電影：只要唔郁，暴龍就唔會發現你
真實：其實佢有眼睇，見到你

（唔郁就唔會發現你應該是喪屍之類吧？）

電影：鯊魚幾時都咁肚餓
現實：其實佢每3日會食一隻海豹

（咁佢唔食其他魚架？）