日本新菜式薯條蕎麥麵

文：MenClub Mean娜　　圖：互聯網
POSTED ON 20 May 2015

12點鐘，又係放Lunch時間，你哋今日食乜先？Mean娜就未放飯，但肚仔餓餓，唯有上網睇吓有咩好食。喂！點知畀我見到日本呢期興緊呢樣食物，知唔知係乜？一眼明晒，就係薯條+蕎麥麵！好明顯呢間嘢一定係明將啲Friend啦！就咁睇好似奇L怪咁，但呢個新菜式，竟然畀佢由大阪紅到去東京，唔通呢樣嘢係堅好食？

「薯條蕎麥麵」最早其實係大阪「阪急そば若菜」推出嘅商品，就係將酥脆的薯條，泡到蕎麥麵的湯裡面，充分吸收湯汁。


呢種奇奇怪怪的食法，以為玩一排就會完啦，點知最近竟然傳到東京，富士そば某啲限定分店（例如︰神田店、渋谷下田ビル店、鶯谷店），都開始提供薯條蕎麥麵。


售價仲要比富士そば其他蕎麥麵貴啲，又再質疑，唔通真係好好食？？

不過同大阪「阪急そば若菜」唔同，富士そば的薯條蕎麥麵，並唔係分開送上，而係直接將佢哋放埋一齊送上。

放喺蕎麥麵上的薯條，唔會好似一般薯條咁，有加鹽調味，而係唔加調味就咁炸，然後浸泡在湯裡，吸收蕎麥麵湯的味道。聽聞仲會越浸越好食。

如果嚟緊去日本的話，大家不妨試吓呢款新菜式，睇吓味道Work唔Work？