- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
如果要數近20年足球壇最成功嘅後衛，你會諗到邊個呢？我Mr.波特諗到嘅就係意大利傳奇後衛，人稱「大簡」嘅簡拿華路(Fabio Cannavaro)。點解係佢？因為只要你翻查番近20年甚至更遠嘅歷史，能夠奪得金球獎同埋世界足球先生兩大殊榮嘅後衛，就只有簡拿華路一個。 | |
| 唔講你可能唔知，現年43歲已經退役嘅「大簡」目前喺中超做緊天津權健嘅領隊，雖然已經唔再落場比賽，但係佢成功用佢嘅智慧去繼績佢嘅足球事業。 | |
| 講番「大簡」球員生涯，佢喺12歲就比意大利著名球隊拿坡里嘅球探發掘從而加入球隊，當時嘅佢並無好多踢球嘅機會，更多只係做球隊嘅球童，但係佢就可以近距離睇到馬勒當拿同費拉拿呢啲頂級球員嘅訓練。 | |
| |
| 直至15歲，「大簡」正式加入拿坡里嘅青年軍，但開始嘅時候佢踢嘅係中場，直至後來球隊教練決定將佢改造成一名後衛。年輕嘅簡拿華拿喺當時嘅球隊訓練中，有幸同馬勒當拿一齊訓練，而有一次佢仲好兇狠咁剷低左呢位阿根廷球王，隨即拿坡里嘅球員同工作人員都非常緊張，當面斥責「大簡」。不過馬勒當拿本人就無因為咁就好不滿，佢仲鼓勵「大簡」繼續以佢想嘅方式踢落去，可能就係咁奠定左「大簡」未來喺攔截方面嘅勇猛。 | |
| |
| 1993年3月7日，「大簡」以19歲之齡正式為拿坡里一隊上陣，而佢亦因為出色嘅防守好快成為球隊後防嘅主力，同費拉拿成為球隊嘅正選中堅。不過由於拿坡里其後出現財政問題，所以「大簡」就只係為球隊效力左兩個完整球季就被賣去帕爾馬。 | |
| 加盟帕爾馬後，雖然陣中有多位出色嘅後防球員，但係簡拿華路好快就獲得主力中堅嘅位置，而之後佢仲同門將保方同埋法國中堅杜林組成歐洲非常出名嘅後防鐵三角。喺帕爾馬效力7個球季期間，「大簡」一共為球隊帶黎1次歐洲足協盃冠軍、2次意大利盃冠軍以及1次意大利超級盃冠軍。 | |
| |
| 雖然「大簡」嘅表現非常出色，但好可惜嘅係佢嘅球隊再一次出現財困，所以被迫喺2002年夏天將佢以2300萬歐元賣比同樣喺意甲嘅豪門國際米蘭。不過，由於當時國米隊內正處於混亂之際，所以未能團結一致取得好成績，而「大簡」亦喺國米迎黎自己生涯嘅低谷，最終喺2004年夏天佢被國米以1000萬歐元賣至祖雲達斯。 | |
| 加盟祖記令「大簡」重遇番帕爾馬嘅兩位後防前隊友保方同杜林，所以佢好快就回復番巔峰狀態，並為球隊帶黎連續兩年嘅意甲聯賽冠軍。但可惜嘅係，祖記卻出現唔少人都聽過嘅「電話門」事件，呢件事被意大利足總調查後證實祖記有打假波，所以喺2006－07球季將會被強制降班至意乙聯賽。 | |
| |
| 而係2006年呢個夏天，亦係簡拿華路生涯嘅巔峰，因為佢以隊長身份協助意大利國家隊成功喺世界盃決賽擊敗法國，奪得賽事冠軍，係意大利自1982年後首次奪得嘅世界盃冠軍。而最令Mr.波特我印象深刻嘅就喺當時同法國互射12碼，「大簡」喺隊友入球後完全無反應，就好似一支「定海神針」一樣，型到爆炸。直到真係確認球隊奪得冠軍後，「大簡」先真係釋放自己嘅情緒慶祝。 | |
| 拎左世界盃冠軍之後，「大簡」決定離開祖記轉投西甲班霸皇馬，而皇馬以700萬歐元低價簽左佢，並且比左施丹留落黎嘅5號球衣佢。最終喺2006年年底，「大簡」憑住世界盃出色嘅表現，成功奪得金球獎以及世界足球先生兩大殊榮，係足球史上第一位後防球員做到的。 | |
| |
| 「大簡」喺加盟皇馬三個球季中，先後為球隊帶黎2次西甲聯賽冠軍以及1次西班牙超級盃冠軍。之後完成左皇馬嘅三年合約後，佢就決定重返祖記，但係當時嘅祖記球迷卻大叫反對。雖然「大簡」喺賽季開局表現並唔差，但係之後球隊狀態下滑，而「大簡」亦遭遇受傷，最終球隊喺聯賽成績並唔理想，球迷亦對於「大簡」嘅表現極度不滿，所以被迫之下祖記亦只能放棄佢。離開祖記後，「大簡」無法喺歐洲搵到新東家，所以佢只好到阿聯酋聯賽繼續球員生涯，但係由於佢膝部嘅傷勢嚴重，所以被迫喺2011年7月宣佈掛靴，當時嘅佢大約37歲。 | |
 | |
| 雖然唔可以再喺球場以球員身份比賽，但係佢就以教練身份繼續帶隊比賽，先後曾出任過廣洲恆大、沙特阿拉伯球隊艾納斯以及現職天津權健嘅領隊。 | |
| |
| 簡拿華路除左球技了得，佢作為意大利人嘅外型亦殺死唔少少女，絕對係球場上嘅美男子之一。不過呢啲都唔重要，其實以佢嘅身高只有1.76米，作為中堅喺絕對不利的，但係佢對於球賽嘅閱讀、體能同球技都係頂級，所以將佢身高上嘅劣勢成功化為零。而以佢喺球壇曾經取得過嘅成就，簡拿華路絕對係足球史上最偉大嘅中堅之一。 | |
| 簡拿華路相片 | |
| |
| |
| |
| |