西甲日前完成煞科戰，而由於冠軍早早就落入巴塞隆拿手中，所以焦點就落喺最後一次代表巴塞上陣嘅傳奇球員「小白」恩尼斯達身上。早喺賽季結束前，小白已經宣佈將會喺今季後離開球隊，而作為傳奇級球員，球迷當然對佢非常不捨。

而為到恩尼斯達有一個完美結果，巴塞亦好識做將佢放喺正選陣容，並喺比賽80分鐘將佢替換，令佢可以接受現場魯營球場所有球迷嘅掌聲致敬。可以睇到被換走嘅小白，一路與場上所有隊友、別隊球員及球證逐一握手及擁抱。呢場比賽作為佢巴塞生涯嘅完結，走到後備席坐低嘅佢明顯情緒亦非常激動，雙眼通紅，絕對係非常不捨球隊嘅表現。

賽後，巴塞亦特別為恩尼斯達舉行歡送儀式，現場所有球迷加上球員一齊為呢為傳奇送上祝福，球會亦為佢送上巴塞波衫作為紀念。其後小白拎起支咪多謝球迷及球會嘅時候，都非常傷感，繼續眼紅紅，而身後一班巴塞隊友，特別係美斯同蘇亞雷斯都帶住非常不捨嘅眼神。最後，巴塞一眾隊友上前將恩尼斯達拋上空中，以感謝同祝福佢未來嘅前路。

歡送會過後，恩尼斯達亦獨自一人留在魯營球場，看著此情此景真的令人非常傷感及非常不捨。

現年34歲嘅恩尼斯達，12歲就進入巴塞青訓，2001年開始為巴塞B隊踢球，直到2002-03球季開始被升上一隊踢左幾場比賽。2004-05球季，小白正式成為巴塞一隊嘅固定成員，不過當時嘅佢還是不時以後備身份上陣。

不過其實當時嘅恩尼斯達已經被非常睇好，當年還作為巴塞隊長嘅哥迪奧拿就曾對沙維表示：你將會令我要退役，而佢(恩尼斯達)將會令我地所有人都要退役。」呢一句說明恩尼斯達嘅天賦究竟有幾被期待！

最終，恩尼斯達真係成長為一名世界級球星，係巴塞嘅絕對核心，甚至唔少人都表示美斯能夠有咁好嘅表現，都係因為背後有恩尼斯達呢位隊友。而小白嘅傳球技術及個人盤扭技術確實舉世無雙，甚至其美妙程度可以用藝術黎形容。

效力巴塞一隊16年期間，恩尼斯達一共為球隊上陣左674場攻入57球，而佢為球隊則帶黎多個冠軍錦標，其中包括：9次西甲冠軍、4次歐聯冠軍、6次國王盃冠軍、7次西班牙超級盃冠軍、3次世冠盃冠軍及3次歐洲超級盃冠軍。