MenClub早前報道過，日本於3月底推出facelift版Corolla，話咁快本港代理就引入。有MenClub讀者幾星期前問我，會否測試Corolla。

我話：「會」

之後，讀者幾日前再用fb msg我，

話：「仲未見有test report，你哋應該唔會試Corolla㗎嘞」，

我問：「點解？」

佢補充：「Corolla呢啲『屋企車』，唔啱你哋MenClub嘅style，估你哋唔會介紹同試車。」

咁我問：「如果你假設我哋唔會試，點解仲會PM我？」

佢話：「冇嘅，搵人吐吓悶氣啫！」

OK！明白！

從試駕角度，Corolla本體沒甚麼值得大講特講，亦管不用華麗詞藻為它「貼金」吹噓，講到天上有，地下無。筆者自入行以來，已見証著四代Corolla（110、121、141、161）的銷售與誕生，總覺得車系無特色，很平淡，但每當新一代推出，卻又不自覺深入地去思考其設計，畢竟，Corolla車系自1966年誕生，已賣出超過4070萬部，總不能求求其其兜個圈寫兩筆就收工。

Corolla顯然不是標青突出，形像鮮明的汽車，如果佢喺食物，只會像一包嘉頓方包；如果佢係人，只會像大企業的小職員，即是老闆永遠記不起他姓乜，極可能用「阿邊個邊個」稱呼佢。這種小腳色，在現今互聯網主導、facebook、Instagram文化充斥的現代人生活，註定呃唔到like，甚至無人like。說真的，我相信豐田章男很清楚這一點，儘管他永不會親口認同。

不過，我一直視Corolla為後生仔，中年男人累積財富與擁有入門房車生活的穩陣配搭。在我從事汽車雜誌編輯的日子（2001-2011），的確見過不少友好讀者，慳慳哋養部Corolla、Corona或Echo Verso，部車多年都無病無痛，算幾慳油，真正慳皮Gas & Go。與此同時漸漸累積財富，由同屋企人住，租屋，到擁有自己的小單位，再樓換樓，搬到舒適闊落的名牌屋苑，後來，亦轉揸平治、寶馬或凌志。

當然，絕不能將Corolla與「剩到錢」、「加快上車」架上等號，畢竟各有前因。但當你仍然逗份糧，鬆動之中又未算好好好鬆動，日常開支，尤其是相對高消費的開支（如養車），就要睇得緊，否則「搵錢風咁快，洗錢快過風」，到頭來都係「冇錢剩」。

截至上一代Corolla，輸港的Corolla車系仍然採用自然吸氣1.5公升直四引擎及四前速自動波箱，這種型式的機械設計與配搭，自80年代中期沿用至2010年，其可靠耐勞程度已高到不能再高，維修方面，說得庸俗請勿見怪：「阿豬阿狗嘅車房都整得掂，都會整得好」，就算車齡年屆七年要驗車，求其找家車房代辦排期就順利過關。我從來未親耳或間接聽聞有人話：「%$#＊，畀部Corolla煩死我嘞！」，真的無聽過。

打穩陣波的汽車，尤其是極穩陣的那一種，在科技新意方面，必然悶透。今代Corolla，依然無德國相近容積的Turbo引擎，更沒有加速閃快得像高性能跑車的dual clutch自動波箱。繼續企硬配1.5公升自然吸氣直四引擎，稍為有噱頭的，只加配引擎怠速start-stop功能，109匹13.9kgm咁大把。波箱屬無段變速（CVT），不設加減波，坦白講，若非Corolla這金漆招牌，望多眼都慳番。

實際揸落點？以配CVT波箱的1.5公升直四N.A.引擎日本房車，D波傳送動力算紮實，我在葵芳新都會廣場取車，第一腳油起步無傳統CVT「跣住去」的加速感，好好！沿荃灣路、青衣北橋、經青衣北岸公路往大嶼山，以暗斜路面居多，我輕輕印住油門以80至100km/h巡航，引擎轉速保持在1500rpm至1800rpm之間，引擎運轉算靜，如果你有機會去試車，不妨keep住上述轉數feel一feel。

回程時，我刻意揀呈祥道、龍翔道往東九龍，以D波應付徒坡路段（由瑪嘉烈醫院對出彎位至畢架山花園），「力水」夠（試車時兩個成年男子，約共150kg），談不上衝住去，但內勁不俗，想短途衝刺，撥去右邊S波，引擎轉速即時拉高至3000rpm，如果忍得住引擎聲浪，4000rpm左右幾好力。不過，「谷一陣」已夠停牌，可以撥番去D波。

Corolla房車，絕少人理會其軚感，原因好簡單，因為軚感一向欠清晰，講得絕，「因為冇囉！」大家的焦點只在其輔助力度是否充足，這一點當然無失手。不過，如要認真去分析，今代Corolla轉向比例及軚感原來「唔係咁差」，起碼比上代（代號141）實在。

車廂設計，略嫌太過工整，冷氣出風口的造型（尤其是A柱旁的旋鈕式出風口），貌似八、九十年代的豐田Coaster小巴冷氣出風口，哈哈！不過，前、後座及車尾廂空間相當闊落，坐落前後座攤開雙手，仲以為係豐田Comfort的士，要空間大，今代Corolla無得輸。

外形嘅嘢，唔知點講，恕我老餅恕我out，尚未接受到，我始終好懷念吉田健年代的AE 100 Corolla，好順眼，車尾線條好柔滑，少少似縮水元祖Aristo。

Toyota Corolla 1.5規格

售價：$194,600（Corolla Luxury）；$221,900（Corolla Super Luxury）

代理：皇冠汽車 www.crown-motors.com

車型：四門五座

體積：（長）4400mm x （闊 ）1695mm x （高）1460mm

軸距：2600mm

引擎：1496c.c. 直列4汽缸，前置引擎

馬力：109匹/6000rpm

扭力：13.9kgm/4400rpm

波箱：無段變速自動，前輪驅動

懸掛：（前）麥花臣支柱；（後）扭力桿

制動：（前）透氣碟；（後 ）鼓式

車重：1085至1115kg

輪胎：Dunlop SP Sport Fast Response 175/65 R15 84H