南韓汽車喺過去十年嘅發展真係好快，快到每次有新產品推出都令人充滿驚喜。

去年底喺香港發表嘅現代（Hyundai）豪華房車Genesis，無論外形設計、動力系統、車廂造工、安全表現、駕乘質素同車廂隔音寧靜度，都直逼德國同級對手，絕對令香港車迷同汽車用家耳目一新。

講到香港人最熟悉同最具認受性嘅Hyundai車系，Tucson一定穩佔三甲。過往兩代Tucson都深得香港汽車用家好評，當然同佢動感外形、車廂空間闊落，安全耐用、極具競爭力嘅售價同高質素嘅售後服務有關。

第三代Tucson正式登陸香港，將全新Tucson同上一代對比，絕對稱得有飛躍進步。

先講外形設計，建基於Hyundai最新嘅Fluidic Sculpture 2.0流體雕塑設計理論製作，令整部車充滿動感之餘，車身肌肉線條亦帶剛陽氣息，女性用家固然覺得全新Tucson更有安全感更可靠，對熱愛戶外活動或鍾情動感打扮嘅男士，全新Tucson絕對係襯搭個人形象嘅理想座駕。

望清楚啲，全新Tucson喺車頭、車尾嘅線條處理好有新意，亦都好有特色。例如呈六角形嘅鬼面罩，沿住輪拱一路望到車尾，多組稜線賦予全新Tucson鮮明性格。再由車尾向前望，全新Tucson嘅跑味比上代大增，可謂眼前一亮，唔話你知，你未必想像到呢部咁有型嘅SUV，就係全新Tucson。

Hyundai喺不斷突破汽車設計框框嘅同時，亦好落力提高汽車照明技術同安全。以全新Tucson為例，車頭採用LED雙投射式頭燈連整合式LED日光燈，令全新Tucson嘅目光更銳利；特大弧度嘅車尾LED燈，就大大提升晚間行車時嘅型格與霸氣。

Tucson多年來深得香港汽車用家愛戴，闊落多變嘅車廂空間係主因之一。

第三代Tucson採用全新底盤，大大增加車廂空間。無論你係任何一種身型，坐嘅係前座或後排，都一定可以坐得舒舒服服，而且有合心意嘅腿部伸展空間。今次試駕嘅版本配備特大天幕連天窗，大大增加車廂透光度，視覺上更開揚。畀啲空間數字你參考，全新Tucson位於車尾嘅行李置放區域，高達513公升，橫向空間超過一米，當放平後排座椅，更達到驚人嘅1503公升。咁鬆動，放兩大部mountain bike都冇難度啦！

後座腿部伸展空間充裕，上落車空間闊落。

放平後座椅背，載物空間激增至1503公升

五個坐滿，行李空間仍然高達513公升。

掀背門設有電動開關，好方便。

當然，全新Tucson唔止淨係靠大空間，取悅傳統同新一代嘅SUV買家，喺整個車廂，都可以見到大量高質物料，而有相當部份更具柔軟觸感，進一步提升駕乘享受。

兩組12V電源供應插座，又有USB插口，夠「餵飽」自己同家人嘅手機同tablet

睇完全新Tucson喺外形同內裝嘅多項突破設計，終於到試駕環節。全新Tucson配搭一副2公升直四Nu MPI引擎同六前速自動波箱，最大馬力達155匹/6200rpm，峰值扭力19.6kgm/4000rpm。為咗更體貼用家駕駛偏好，今代Tucson設行車模式選擇，3個模式包括Eco（經濟）、Normal（一般）同Sport（動感）。

喺Eco模式之下，低轉速嘅加速反應相對柔順，行長途，喺公路巡航，最啱用。波箱會較早轉波，盡量善用慣性衝力，大大降低整體耗油量。轉去Sport模式，高轉加速反應快得多，波箱會喺較高轉數先轉波，激發引擎最大潛能。

喺山路或巿區彎路揸住全新Tucson，會發現成部車剛度好高，好紮實，但同時又有準繩嘅入彎表現，呢兩點好值得畀Like。睇番廠方公布嘅技術資料，原來Hyundai喺全新Tucson大量採用高強度鋼材（Advanced High Strength Steel），另外，全車有51%嘅結構都用咗高強度鋼，而上一代嘅高強度鋼使用比例只有18%，唔怪得揸落咁實淨啦。實際數字顯示，廣泛採用高強度鋼材嘅全新Tucson，平均強度增至63.5kgf，但又同時能夠「減磅」達12.1kg，硬淨咗又輕咗，真係正！

全新Tucson車身剛性大幅度提升，喺山路同大彎，成部車好紮實，好firm！

與此同時，全新Tucson配備多種電子安全系統，除咗今日汽車不可或缺嘅ESC（電子穩定控制）、VSM（車輛穩定管理）、防鎖制動系統（ABS）、制動輔助系統（BAS）以外，更有提升SUV喺野外行車表現嘅DBC（下坡制動控制）同（HAC）爬坡輔助控制系統。

全新Tucson設有多組電子安全系統，大大提高行車穩定及安全程度。

整體嚟講，全新Tucson憑住剛度更高嘅車身結構，令Hyundai嘅工程師喺抑制噪音、震盪同粗糙感三方面，取得重大改進。實際試駕同試坐之後，自然會認同一點，新Tucson喺同級對手之中，係其中一部最寧靜同車廂裝造手工最細緻嘅SUV。