由日本漫畫家奧浩哉所創作嘅《GANTZ殺戮都市》，先後被改編成動畫及真人版電影，當時更搵嚟二宮和也、松山研一、吉高由里子等影星主演。事隔將近10年，日前Sony Pictures就宣布要拍返個荷里活真人版，而且連導演都已經搵好。雖然漫改電影多數都係伏，但考慮到《GANTZ殺戮都市》咁多特效，並由西方女星著緊身衣詮釋角色，或者會幾有睇頭？

據外媒Deadline報導，電影將由《Overlord（大君主之役）》導演Julius Avery執導，擔任過多部DC英雄劇集編劇嘅Marc Guggenheim執筆，目前仍處於早期開發階段，演員陣容、開拍日期通通都未知。

《GANTZ殺戮都市》曾於2011年翻拍成真人版電影。

《GANTZ殺戮都市》自2000年起於《週刊YOUNG JUMP》開始連載，直到2013年6月完結，劇情講述男主角玄野計意外喪命，隨即被傳送到一個神祕房間，房中間有一個名為「GANTZ」嘅大黑球，同時聚集咗多位本來已經死亡嘅陌生人，眾人為求重獲新生，只好聽從「GANTZ」指示執行任務。