Leonado DiCaprio近日為咗宣傳新戲《One Battle After Another》，而與導演Paul Thomas Anderson於雜誌《Esquire》中展開對談。當中DiCaprio提到平時唔太會睇自己主演嘅電影，但唯獨2004年上映、Martin Scorsese執導嘅《The Aviator》（娛樂大亨）睇得最多，因為佢認該電影標誌住佢唔再單單係演員、而係參與者嘅重要時刻。

卻說二人於對談中先係提到由Robert De Niro及Charles Grodin主演嘅動作喜劇《Midnight Run》（午夜狂奔），DiCaprio更指當年佢爸爸就係帶佢去戲院指住套戲同佢講：「阿仔你想做演員呀？呢啲就係演戲啦。」隨後Anderson就問DiCaprio會否睇自己主演嘅電影。對此DiCaprio指佢通常都會唔會睇，「但如果老實講，有一套我係睇得特別多次，就係《The Aviator》。因為套戲對我黎講係一個好特別嘅時刻。」

佢指自己當時已經睇咗Howard Hughes（戲中主角）嘅傳記書近十年時間，仲差啲與《Heat》導演Michael Mann將其拍成電影，但後來有「衝突」所以拍唔成，最後佢就將個故事帶去Martin Scorsese手上。而拍攝時三十歲嘅佢，於電影中第一次覺得自己唔再係「被請返黎演戲」嘅人，而係有份參與內在製作嘅人。亦因為咁佢覺得有與別不同嘅責任感及自豪感，並認為電影代表佢「於這個行業成長的關鍵部分，也是我第一次擔任真正合作者」。

訪問中另一樣有趣嘅係，由於DiCaprio於《One Battle After Another》中飾演一個曾經係革命者，但因為各種現實打擊而變得封閉、人生停滯不前嘅父親，所以為咗解釋呢種停滯不前，Anderson問DiCaprio「假如你唔知自己幾歲，咁你覺得自己依家幾多歲？」，並指出「而你去睇下自己嗰個歲數時究竟做咗啲咩，就知點解會有呢個答案。」而DiCaprio嘅回答係「32歲」——如果佢一直都覺得自己32歲，咁搵個25歲以下嘅女朋友似乎又唔算好過份？

資料來源：Esquire