繼超長單行鍵盤、茶杯鍵盤、雙面鍵盤後，日本Google旗下嘅Gboard團隊又有新搞作！今次佢哋顛覆咗傳統輸入文字需要「按壓」嘅概念，以舊式撥輪電話為靈感，創作出一款撥輪式鍵盤。

製作團隊表示，傳統鍵盤只有按壓、敲打等線性輸入方式，為咗令大家打字同溝通變得更加「圓滑」，所以創作出呢款名為「Gboard ダイヤルバージョン」嘅創意鍵盤。使用方法就類似以前嘅舊式撥輪電話，用家只要將手指插落孔洞，並轉動撥輪到底後鬆開，即可輸入對應嘅字元或符號。

為咗提升輸入速度同埋縮細鍵盤尺寸，團隊將英文字母、數字、符號及功能鍵分拆成多個獨立撥輪，而Enter鍵雖然保持原樣，但都係要「撥」嚟使用。而且轉動撥輪時，會有「咔嗒咔嗒」嘅聲音同埋適當阻力，完美模擬出使舊式電話嘅操作感。

同以往嘅創意鍵盤一樣，製作團隊並冇計劃量產發售，不過就好熱心咁將製作教學、材料清單、電路設計圖等資料放晒上GiuHub，等有興趣嘅朋友可以跟住嚟DIY。