早前我哋報導過，有五十年歷史、陪住好多代人長大嘅日本特攝系列《超級戰隊》，將於目前播緊嘅《第一戰隊五獸者》後正式結束，而當時官方畀出嘅理由係「系列收入已經不足以支撐龐大嘅製作費」。但點解一個擁有國民級知名度嘅IP會搵唔到錢呢？近日日本動漫遊戲作家「多根清史」就於《集英社Online》上撰文分析，指出少子化、出售海外玩具版權、以及成人化策略失誤，就係導致《超級戰隊》收入不足嘅原因。

首先最明顯嘅原因就係少子化。日本人生育率越黎越低，意味住《超級戰隊》系列嘅目標客群規模本身就越黎越細；而比起睇電視，現代小朋友更傾向將時間花在手機遊戲、YouTube等身上，亦進一步壓縮《超級戰隊》嘅生存空間。「多根清史」表示10月26日播出嘅《第一戰隊五獸者》關東地區收視僅得1.6%，係低得非常離譜嘅數字。無小朋友睇，自然就無小朋友想買玩具，於是就影響咗系列嘅收入。

睇返《超級戰隊》玩具開發商Bandai Namco嘅財報，近年《超級戰隊》嘅玩具收入僅得65億Yen，與《幪面超人》嘅300億Yen、以及《超人力霸王》嘅140-200億Yen有明顯差距。

值得一提嘅係，《超級戰隊》玩具收入咁少，某程度上係Bandai Namco早幾年嘅自作自受。「多根清史」2017年時，指Bandai Namco嘅《超級戰隊》玩具收入有成200億Yen，當中只有88億來自日本本土。但同年美國《Power Rangers》版權擁有者Haim Saban拍過一套真人版《Power Rangers》，結果電影票房爆死，導致佢向孩之寶出售版權，而孩之寶亦向Bandai Namco收購除日本及部份地區之外嘅玩具版權，Bandai Namco自此就失去當年美版《Power Rangers》創下嘅巨大海外市場，僅能以日本本土市場苦苦支撐。

其實《幪面超人》及《超人力霸王》都曾經面對類似情況，但佢哋就成功轉型。「多根清史」指《幪面超人》近年開始推出海外版配信，正式進軍西方市場；而《超人力霸王》則於中國有一班忠實Fans，同樣支撐系列繼續發展。

另一邊廂，《超級戰隊》近年試圖轉型亦唔成功。「多根清史」指2017年嘅《宇宙戰隊九連者》之所以有九個戰隊成員，就係試圖曾加角色多樣性，吸引更多不同觀眾之餘可以推出更多玩具款式。呢個策略一開始的確有帶動銷售數字，但後來想儲齊一套嘅成人買家們發現產品實在太多太雜，根本無可能儲齊而棄坑；而開發更多玩具款式本身又推高Bandai Namco嘅成本。此消彼長之下，《超級戰隊》嘅玩具收入自然大幅下跌。

＼特撮シリーズの新ブランドが誕生／
2026年より【PROJECT R.E.D.】始動

#スーパー戦隊 シリーズの枠で、新たな特撮ヒーローシリーズ【PROJECT R.E.D.】が始動！
“赤いヒーロー”が活躍する新たな特撮映像シリーズ
第一弾は、『超宇宙刑事ギャバン インフィニティ』。
『 #宇宙刑事ギャバン… pic.twitter.com/clnXdf3ysF

— 東映公式ニュース (@TOEI_PR) November 23, 2025

而從東映上月尾宣佈新特攝企劃「Project R.E.D」，並公佈系列第一輯會係《超宇宙刑事卡邦 Infinity》（借咗1982年特攝片《宇宙刑事 卡邦》個名，但宣稱「從零開始」）黎睇，佢哋似乎係打算建立一個只得單一英雄嘅全新特攝系列，某程度上應該係吸取咗《超級戰象》系列失敗嘅教訓。換個角度睇，亦可以話佢哋知道玩爛咗原本一手好牌嘅《超級戰隊》，於是決意「砍掉重練」。至於「Project R.E.D」嘅前路係點，相信就要等到系列見街後先知道啦。

資料來源：集英社Online