由HBO製作嘅劇集版《哈利波特》今日震撼公開首部預告，帶領觀眾重返充滿魔法嘅奇幻世界！除咗正式揭曉多位角色完整造型，仲驚喜宣布劇集將於2026年聖誕期間正式播出，比原定嘅2027年提早咗唔少！

短短兩分鐘嘅預告片，已經重現出多個原著同2001年電影版嘅經典場面。一開頭就見到哈利被困喺樓梯底嘅儲物室，受盡表哥達力欺凌，仲被姨媽佩妮強行剪咗個極難睇嘅髮型。直到收到霍格華茲嘅入學信，加上由Nick Frost飾演嘅新版海格登場，向佢揭開魔法世界嘅真相，命運先出現轉機。其後畫面一轉，哈利帶埋貓頭鷹嘿美推住行李衝入9¾月台，並喺霍格華茲特快列車上認識到榮恩同妙麗，正式展開魔法之旅。預告仲快速帶過多個熟悉畫面，包括分類帽儀式、哈利開箱飛天掃把、魁地奇比賽、上草藥學堂，以及鄧不利多、石內卜、馬份同奧利凡德等經典角色逐一登場。

HBO劇集版《哈利波特》由《Succession（繼承之戰）》製作人Francesca Gardiner擔任節目統籌同監製，《The Menu（五腥級盛宴）》導演Mark Mylod會執導部份集數 ，而原作者J.K. Rowling亦會擔任監製。劇集將忠於原著，預計每季改編自原著小說一本書。大家睇完預告又有咩感覺呢？