{ SKIP }
文:MenClub 玄火  圖:互聯網
POSTED ON 29 Aug 2019
坐在房入面那位,人工高過你、職位高過你,偏偏能力低過你、學歷低過你、說話廢過你,分分鐘主意又是你出,有鑊又是你揹,點解會咁?是咁的,曼聯把阿歷斯山齊士送去國際米蘭,話就話收到借用費,實情是要承擔4分之3的人工,印證呢個世界唔再係一分錢一分貨...兄弟爬山,各自努力吧!

冇得揀 續供負資產

30歲的山齊士由阿仙奴入魔後,完全無料到,上陣45場先入5球,無表現但人工極高反而谷高晒個薪資水平,真係睇見都眼火爆。最精明都是山神,佢而家在曼聯賺40萬鎊周薪,一直唔肯減人工離隊,最近國米最終答應支付10萬鎊周薪借入山齊士,餘下30萬鎊繼續由紅魔「供款」,慘過供樓之餘衰啲講句直頭係負資產。國米借人仲要唔加入買斷條款,擺明信心麻麻。

老老實實,曼聯只怪自己眼光差,門將迪基亞續約前已冇乜表現,但周薪照樣加到37.5萬鎊;中場普巴跌落陣中第3順位,周薪都有28萬鎊,個個星期都可以買跑車;反而土炮Marcus Rashford和法國外援Anthony Martial,同賺20萬鎊周薪,並列第4位,性價比仲高一層。

齋坐逗份糧

類似情況在其他勁旅身上,比比皆是,阿仙奴最高薪的奧斯爾(35萬鎊)今季頭3場缺陣,似乎同之前被賊人嚇親有關,現在要少少時間定驚;同場被嚇的仲有Sead Kolasniac(10萬鎊),但總算場外有勇武表現。第2位奧巴美揚(20萬鎊)同拿卡錫迪(18.2萬鎊)總算值回身價,但18萬鎊米希達恩又係唔知點解會咁高人工,令人莫名其妙。

假如,呢個世界上有「人工再分配」的機器,根據大數據來衡量能力,再以能力來分配人工,唔知得唔得呢?球場如人生,人生如球場,球場是一個好好的試點。而球場外只靠食老本的廢老,就唔該借歪,一係去增值,大膽講句,真係有好多後生仔有能力坐你哋個位。

一個人周圍認叻,正好證明他沒有專長,樣樣唔叻,沒事可做的特質。
powerandmoney
傑克 - 認叻的四個現實反映
21 Oct 2019
而家這個時勢,上到車也未必是贏家,實在值得三思。
powerandmoney
傑克 - 上車前要諗諗
17 Oct 2019