疫情仍然嚴峻，目前不單止要在家工作，甚至乎連晚上落街食飯都要盡量避免，全民同心，合力打好呢場疫戰。既然早晚都要留在家中，不如趁機培養一些良好習慣，日後回復正常生活時，都可以生活得更健康快樂。

睇書

都市人過往的生活已夠忙碌，即使有空閒時間，都寧願選擇煲劇、睇戲、打機、補眠等，相信輪極都輪唔到睇書了。以往行書展買落的書，一直都不過是裝飾擺設，難得而家日日要待在家中，不如從新培養睇書這種兒時習慣，除了增進知識，仲可以陶冶性情。

做運動

雖然健身室關了門，落街跑步又驚人多受感染，但在家中都一樣可以培養做運動習慣。簡單的掌上壓、Sit Up、舉啞鈴、轉呼拉圈，再簡單如原地踏步、拉筋、跳繩等，都可以一邊煲劇一邊做，每日30分鐘，經過這兩個月的培養，到回復正常生活後，唔做運動反而唔舒服。

傾電話

政府立例禁止4人以上活動，相信大家在短時間內都沒法與好友相聚，甚至乎連女友都未必可相見。這時候，不如回復返以往未有whatsapp的年代，每日花少少時間與好友、女友傾下電話，講下今日做過咩事，有助增進感情。

反思

忙碌生活之下，我們連反思的空間也不夠。好了，而家日日在家工作，放工後又冇得happy hour，終於可以抽到時間反思一下。反思的範圍可以好闊，工作、關係、前途、計劃、夢想都值得幫自己諗下，回復正常生活後，係咪需要訂立新的目標。

性生活

疫情迫令很多夫妻、同居伴侶都要日日留在家中，日對夜對只得兩個結果，一係生厭而分手，一係感情更深厚。如果是後者的話，就要把握日見夜見的良機，好好地大幹幾場，培養番與對方的親密行為，愛唔止要講出來，仲要多做呀！