近日金融服務公司Empower訪問咗2,000多名18歲以上美國人，了解財富與幸福感嘅關係，結果顯示近6成人認為金錢可以買到快樂，其中千禧世代（Millennials）更認為年薪高達52.5萬美元先能夠「感到快樂」。

《The Wolf of Wall Street》劇照

根據調查結果，1981年至1996年出生嘅千禧世代最難滿足，認為年薪高達525,947美元先能夠感到快樂，理想年薪係其他世代嘅4倍有多。而嬰兒潮世代（1946年至1964年出生）則認為年薪124,165美元已經可以過上舒適生活，至於Z世代（1997年至2012年出生）以及X世代（1965年至1980年出生）理想年薪大約為13萬美元。

除此之外，千禧世代對淨資產嘅要求亦特別高，希望擁有超過170萬美元財富（折約1,325萬港幣），係嬰兒潮世代嘅1.7倍、 Z世代嘅3.5倍，而Z世代嘅理想淨資產亦係咁多代人之中，唯一唔過100萬美元嘅世代。

有分析認為，千禧世代之所以對財務要求特別高，係因為該年齡層正處於成家立室及生兒育女階段，所以要更多金錢先能夠感到幸福。各位千禧世代嘅網友又認唔認同？