E-mailed #CraigFederighi about #FaceID and actually got a response! pic.twitter.com/3Ytt1k6WvK

— Keith Krimbel (@KeithKrimbel) 2017年9月14日

發布會時，官方已經提到同卵雙生嘅孖生兄弟姊妹用Face ID開到鎖嘅機會較大；日前Craig Federighi再透過電郵同媒體訪問，親自解答大眾其他疑問，整合如下：

1: 戴住太陽眼鏡時能否繼續使用Face ID解鎖？

大部分情況下都冇問題，Face ID使用紅外線辨認人樣，一般太陽眼鏡可以畀足夠紅外線通過；但又不能一概而論，每副太陽眼鏡都會過濾不同程度嘅紅外線，同鏡片顏色深淺無關，所以都係視乎個別情況啦。

2: 戴住口罩解唔解到鎖？

Sorry，遮住樣就真係唔得啦，口罩或者面具都唔得（瞓覺驚畀人偷睇手機你知點做啦）。不過頸巾、帽甚至頭盔都可以，化咗妝都認到，認唔到果啲應該叫喬裝。

3: 會唔會有機會畀人搶咗部iPhone，一嘢隊部機埋臉前，強行解鎖？

只要你唔望實部iPhone，Face ID就解唔到鎖。你亦可以喺交出電話前，按住機身兩邊嘅按鈕，暫時停用Face ID功能，唔畀老婆壞人得逞。

4: 部手機要放幾近同咩角度先解到鎖？

基本上同自拍嘅角度差不多，只要前鏡頭睇到晒你嘅眼耳口鼻，就算放大脾咁低，都一樣可以成功解鎖，前提係你望實部機。如果你慣咗放部機喺枱面都成日望吓有冇Message的話，可能要戒吓啦，唔係不停開鎖都幾煩。

5: 盲咗解唔解到鎖？

可以，視障人士關閉「注視感知」（Attention Detection）功能後，即使雙眼冇直視手機，只要鏡頭辨認到臉孔，一樣可以用Face ID解鎖，但安全度就會相對減低。你亦可以選擇唔用Face ID，改用密碼或其他方法解鎖。