人人都講「智慧城市」，唔通人人都想搞「智慧城市」？可能係嘅，今年施政報告話會放七億發展智慧城市基建。咁搭升降機可以用App Call定部升降機上嚟等你，算唔算智能？

電梯廠商奧的斯（OTIS）早前就喺「Made to Move You」展覽活動上，向記者介紹一套智能等升降機嘅手機App「eCall」。eCall係個免費嘅手機App，裝咗之後就會自動連接至大廈嘅OTIS升降機，選擇想去樓層後，喺出門口前利用個App Call部升降機；當部升降機到達時，App亦會顯示喺屏幕上，提你出門口。成個操作原理同依家唔少商廈嘅中央派升降機相似，亦相輔相成，喺個App度按完就可以知道係搭A、B定C升降機，亦會自動記錄你搭開嘅樓層，同支援多棟大廈，返工返屋企按一下就得。

奧的斯香港、澳門及台灣區董事總經理彭祖琳（Julie Brandt）話，eCall可以提供更個人化嘅體驗，亦唔使再擔心衛生問題，用鎖匙呀紙巾呀之類去按升降機。eCall舊年起喺歐洲推行，預計今年底會喺香港試行。Call車都用App啦，雖然等升降機只係短短幾分鐘，邊個話唔可以用App？不過如果可以再智能啲，連接埋屋企度門，一出門就自動按升降機咁就好啦。