日頭晚做返工已經夠辛苦，返到屋企當然想舒舒服服休息一下，但如果你係獨居男人、踏入墳墓嘅已婚男人或不幸嘅細路，就可能冇得抖，需要執屋抹地。呢個時候唔使用劍嘅，搵部識掃地拖地嘅智能機械人咪得囉。

ECOVACS ROBOTICS推出全新DEEBOT OZMO系列地面清潔機械人DEEBOT OZMO 930，集掃地、吸塵及拖地三合一功能於一身，識得用Smart Navi技術掃描你間屋，再運算分析最佳清潔路線。除咗有吸刷同濾網幫手吸塵之外，DEEBOT OZMO 930亦有內置電子控制水箱，識得自動平均曬水拖埋地，一次過搞掂灰塵污漬，拖完仲好快乾。

DEEBOT OZMO 930另一特色係支援用智能手機App，可以設定清潔時間，以及劃出指定清潔區域，例如集中清潔客廳地毯咁。DEEBOT OZMO 930（上）預計於12月中旬上市，售價待定。另外亦有一款入門版OZMO 600（下），同樣有電子控制水箱及支援手機App控制，定價3,998港元，即日起有售。

上圖呢款WINBOT 95抹窗有四階段清潔模式，幫你徹底省乾淨隻窗，抹窗都可以假手於「人」。（$3,388）