Microsoft正在測試一套名為Sets嘅全新功能，原理同瀏覽器分頁大同小異，只係擴展到適用於Windows嘅其他不同應用程式，例如同一個視窗開住Word、One Note、PowerPoint同Edge等幾個唔同程式嘅分頁。好處係唔使開住十幾個視窗轉嚟轉去，連alt+tab都可以慳返唔使按，而且登入Office 365帳戶後，喺其他裝置亦可以開返之前開過嘅分頁，好似瀏覽器一樣。

不過，Sets新功能初步只限適用於部分Windows應用程式，相信要等一段時間收集意見後，先有機會加入其他程式。Microsoft將會於未來幾星期向小部分Windows 10測試員率先開放試驗Sets，實際推出日期同名稱仍然待定，大家睇住預告先啦。