要知點解擔心，首先你就要知咩叫「網絡中立」。所謂「網絡中立」是一個原則，要求所有網絡供應商公平地對待所有網絡流量，簡單啲黎講就即係任何人於任何時間以任何裝置去任何一個網站(或使用任何一種服務)，都應該得到最佳嘅使用效果，亦即禁止網絡供應商通過限制流量、速度等方法造成差異服務。

舉個例，美國家居寬頻供應商Comcast於2008故意阻擋用戶以P2P(即BT)形式下載檔案，令其下載速度變慢甚至不可用，FCC就曾就此展開調查，雖然後來事情不了了知，但Comcast亦停止有關限速。另外Comcast(又係你)又曾經同Microsoft達成協議，用戶使用Xbox 360上嘅Xfinity網絡電視服務不計入流量，但如果使用Netflix、Hulu等其他同類服務則會計入流量。以上都係有違網絡中立原則嘅例子。

喪失「網絡中立」意味住網絡供應商能夠大幅限制用家嘅使用習慣，加上供應商與其他服務千絲萬縷嘅利益關係，極容易就會造成一個龐大嘅利益網。以香港為例，「網上行」與「NowTV」同屬「電訊盈科」擁有，如果漠視「網絡中立」原則，「網上行」可以封鎖所有網上娛樂平台如Youtube、Netflix、MyTV等等，唯獨開放對NowTV嘅流量，一方面逼使你使用NowTV，另一邊廂亦可以收取「解鎖」費用，同時打壓競爭者。除咗令上網更為不便，亦會加大用家使用網絡嘅成本。(講多次，舉例咋下)

Pornhub嘅擔心亦由此起，事關成人網站流量佔整個網絡使用量極大部份(上年單單Pornhub就已經產生超過3110000 TB嘅流量)，如果「網絡中立」失守，網絡供應商好有可能向成人網站或者用戶收取額外費用以保證服務。換言之到時Pornhub唔收你錢，但供應商會收你錢。更嚴重嘅係每樣服務都可以另外收錢，到時上個網都要買DLC呀。

就「網絡中立」一事，MenClub曾致電通訊事務管理局查詢本港是否有相應的規定或法例，可惜職員只回答如果覺得網絡供應商嘅服務有問題可以作出投訴，但未能即時提供「網絡中立」嘅相關資料。但以「網路中立」嘅定義而言，部份流動網絡供應提供嘅「XX數據組合(如Whatsapp流動數據不計入總使用量)」其實理應算係違反「網絡中立」原則。

目前唔知美國方面嘅政策會否影響本港，但大家可能都要留意下網絡供應商嘅服務，一齊盡監督之責啦。