去旅行或公幹唔好話坐頭等艙，有得坐商務客位都相當唔錯。最近Apple董事局就正式要求Tim Cook不論公幹定私人旅行，都必須乘坐私人飛機，理由係「更安全及更有效率」。條數邊個找？梗係公司畀啦。

Apple向美國證券交易委員會呈交一份代理聲明，其中一部分提到要求Tim Cook往後所有商務及私人旅遊，均需要使用私人飛機；不過如果用作私人旅行的話，就會計成額外開支，要自己畀稅。

點解Apple會提出呢項要求？條數係咁計嘅：據官方數字，2017年度Tim Cook嘅個人旅遊總開支約93,109美元（727,700港元），包括機票、燃油等等；但公司就額外洗咗224,216美元（1,752,370港元）去聘請私人保鑣，保安費比旅費開支貴一倍有凸。難怪Apple會諗到，索性迫Tim Cook坐私人飛機好過。未來其他高層亦有機會因應需要而要坐私人飛機，而如果要攜眷的話，公幹就公司畀，私人旅行就自己畀，你明啦。