一年一度嘅動漫盛事《C3AFA Hong Kong 2018》將於2月9日至11日假會展舉行，點解今年C3個名唔同咗？因為今年將聯合日本嘅AFA（Anime Festival Asia）一同舉辦，網羅日本動漫遊戲產品；重點係：今屆將會首次舉辦「GUNDAM VERSUS隊制對戰賽」，獎金高達14萬！

《AFA》由日本SONY MUSIC GROUP旗下的SOZO主辦，新加坡、雅加達、曼谷等地也有舉行。今年與《C3》聯乘在香港合辦《C3AFA》，照舊主力推廣日本動漫潮流文化，參展商包括BANDAI、BANDAI NAMCO、角川、海洋堂、animatecafe、Bilibili等等。

今屆展覽主舞台活動都相當有睇頭，其中包括2月11日會首度舉行「THE PREMIUM GAME IN C3AFA SERIES: GUNDAM VERSUS 隊制對戰賽in C3AFA HK 2018」，年滿18歲就可以組成兩人一隊參賽；初賽勝出嘅8隊就有機會爭奪總值14萬嘅獎金！留意返，對戰可使用大會手掣或自攜手掣，但按鍵設定須為預設值，不可更改。比賽即日起至1月26日於C3AFA官網接受報名，2月11日舉行初賽及決賽。唔少網民留言表示「等睇街機人跳舞比賽」，睇嚟將會有一番龍爭虎鬥喎。

此外，「怪獸娘」亦將會再臨香港，包括兩位聲優飯田里穂同湯浅かえで，同大家大唱動畫歌曲，仲會有超人捷德喺Ultraman Stage大戰宿敵貝利亞，超人迷不容錯過。動畫《天使的3P！》中嘅聲優組合「Baby's breath」亦將會赴港，演唱動畫歌曲。當然唔少得重頭戲「HK 2018 Cosplay大激鬥」，為世界賽作預選。

票價方面成人$35，預售價$30，憑票可免費攜同一名11歲或以下小童免費進場（不包括主舞台入場券）；另外3日通門票則售$75。喜歡日本動漫流行文化嘅朋友，記得留意大會網站有關節目嘅最新公布啦！

日期                        : 2018年2月9 - 11日
開放時間                : 2月9日至10日 – 中午12時至晚上9時 ; 2月11日 – 上午11時至晚上7時
地點                        : 香港會議展覽中心1號ABCD展廳
入場門票：票價HK$35，可於2月9-11日在展場即時購買，憑票可攜同一名11歲或以下小童免費進場。（不包括主舞台入場券）
預售門票：票價HK$30，1月22日起於7-Eleven便利店、OK便利店、MCL院線、動漫世界Manga Shop、Namco公開發售。憑票可攜同一名11歲或以下小童免費進場。（不包括主舞台入場券）