【新字頭】「4」、「7」、「8」新手機號碼本月起有得用！

文：MenClub 路兒　　圖：互聯網
POSTED ON 05 Feb 2018

新一年要換一番新氣象，今年仲可以順手換埋個好意頭嘅新手機號碼添，皆因通訊辦宣布將會開放「4」、「7」及「8」開首嘅流動電話號碼畀公眾使用，合共有1,060萬個號碼，諗定心水號碼先！

鑑於現有嘅流動號碼數量有限，通訊辦喺去年7月1日起釋放「4」、「7」及「8」三組數字開首嘅號碼，畀流動網絡服務商作編配之用。不過由於營辦商需要進行測試，因此預計呢批號碼可於今個月起配予用戶，同現有嘅「5」、「6」及「9」號碼一併使用。留意返，本階段只開放「70」至「73」字首，以及「81」至「83」字首號碼；「4」字頭號碼則全數釋放。例如今期心水號碼嚟講，「4689 4689」就冇問題，「8964 8964」呢就要留返下期啦。

有新號碼用固然開心，但用奇怪字頭打畀人又驚被誤會為詐騙電話？通訊辦就表示，為咗畀市民識別源自香港境外的可疑來電，所有電訊營辦商都必須喺「來電號碼顯示」中加入「+」號。換言之見到「+」號嘅號碼，就算係「9」字頭都可能係巴基斯坦打嚟架，要提高警覺呀。

來源：通訊辦