由年頭開始一直有傳Apple會喺9 月發布三款新iPhone，包括5.8 吋、 6.5 吋 OLED  新iPhone，以及6.1 吋 LCD 新 iPhone 。日前再有新iPhone消息，著名 Apple 產品分析師郭明錤發表投資者報告指，OLED版iPhone 將推出黑、白、金3色，而LCD版iPhone 將會有黑、白、紅、藍、橙5色，即係話今年發布嘅新iPhone將會有金、藍、紅、橙4種新色。

今年4月FCC (美國聯邦通信委員會) 曾經曝光咗一部未開賣嘅金色 iPhone X，由當時流出嘅資料顯示，呢部金色 iPhone X係喺2017年9月8日由FCC審核，直到今年4月嘅保密期限完結先被曝光。

價錢方面，郭明錤喺報告中預測6.1 吋 LCD 新 iPhone售價將會低於 700 美元，而6.5 吋 OLED  新iPhone售價約為 1000 美元，佢預測 6.1 吋 iPhone 嘅銷量比例將會佔新 iPhone  55%。