8月9日就會發布嘅三星Galaxy Note 9近日不斷有消息流出，繼早前嘅官方宣傳片外，今次連套裝禮盒都流出埋。根據中國新浪微博，有網民流出Galaxy Note 9嘅套裝禮盒圖片，禮盒中有一個AKG Y50BT耳機，以及其他配件，但暫時未知禮盒售價。

新浪微博網民閒侃數碼及狠浪喲分別流出咗三星Galaxy Note 9嘅套裝禮盒圖片，禮盒呈長方形，Size粗略估計都有一部15吋電腦咁闊，而禮盒正面係透明並印上「Galaxy Note 9 Value Pack」，可以睇得到入面包含汽車充電器、手機保護殼、數據線等常見配件，另外仲有一個AKG Y50BT耳機。

喺電話規格方面，近日/LEAKS流出咗一張Galaxy Note 9包裝盒嘅圖片，可以由盒背睇到Galaxy Note 9將會採用6.4吋AMOLED屏幕，配上雙1200萬像素主鏡頭，而主鏡頭光圈可以喺F/1.5至F/2.4之間改變，另一主鏡頭光圈為F/2.4。Note 9亦支援960fps超慢動作拍攝，而前鏡頭則為800萬像素。

來源：新浪微博、/LEAKS