近來受到公司創辦人Elon Musk與美國證券交易委員會(SEC)嘅私有化風波影響，Tesla負面消息多多，而號稱「Tesla殺手」、「Tesla最強敵手」嘅電動車生產商NIO(蔚來汽車)上月正式喺美國紐約證交所掛牌上市，日前更獲得Tesla第二大股東Baillie Gifford買入11.4%股份持有，睇嚟電動車嘅戰場將會有一番惡鬥。

上月12日，由中國科技巨頭「BAT」其中之一騰訊力撐嘅NIO正式喺美國掛牌上市，其實NIO係嚟自中國嘅電動車公司，佢第一間喺美國上市嘅中國電動車公司，同時係繼Tesla後第二間喺美國上市嘅電動車公司。Tesla第二大股東Baillie Gifford早前喺一份監管文件中披露，佢持有NIO 8530萬股股份，約為11.4%股份，受消息帶動NIO急升22%，而目前總市值為75.8億美元。

NIO目前主要生產市場為由中國，今年6月份開始交付旗下高性能SUV車款ES8，ES8最大續航距離為500公里，0-100公里加速需4.37秒，最大馬力為650匹；而一般ES8售價為人民幣44.8萬元起，補助後約人民幣37.5萬元，大約係Tesla Model X一半價錢。ES8喺8月份售出1121架，至目前為止生產約2000架ES8，而NIO計劃喺今年年底前推出另一款價格較低嘅電動SUV ES6。

來源：Bloomberg