今年3月 Apple 推出咗第二代 AirPods，除咗新增免接觸式嘅「喂 Siri」功能外，就只係推出咗無線充電盒，外型設計與上代一模一樣，令唔少果迷感到失望。不過 Wedbush 證劵分析師 Daniel Ives 指出，Apple 計劃於今年年底推出第三代 AirPods，而佢嘅焦點就係具備防水功能。

Wedbush 證劵分析師 Daniel Ives 本星期喺一份研究報告中表示，新一代 AirPods 將會喺今年聖誕節前後推出，並將會加入防水功能，除此之外仲會有未指明r嘅設計改進。其實 AirPods 本身都有一定嘅防水能力，今年4月一位台灣高雄男子誤吞 AirPods，事後 AirPods 經由男子體內消化系統排出，事主更將沾滿糞便嘅 AirPods 清洗後如常使用。

除咗分析師 Daniel Ives 外，知名分析師郭明錤都曾經提及過兩個新 AirPods 型號可能會喺2019年第4季度，或2020年第1季度進入量產階段，而新款 AirPods 並將採用全新外形設計及較高價格。畢竟 AirPods 自2016年推出以來都未有改變過外型設計，而顏色亦只有白色選擇，難免第二代 AirPods 推出後令唔少期待黑色版 AirPods 嘅果迷失望。

來源：MacRumors