自從 Apple 喺 iPhone X 上推出 Face ID 後，iPhone 8 就成為咗最後一部可以使用指紋辨識 Touch ID 嘅 iPhone，所以有唔少留戀 Touch ID 嘅果迷都繼續留守唔升級手機，同時亦有聲音希望新 iPhone 再次加入 Touch ID。今次終於傳嚟好消息！知名 Apple 產品分析師郭明錤預測指，2021年 iPhone 將會以超聲波技術重新引入 Touch ID，係不侷限於特定位置嘅螢幕指紋辨識技術。

據外國科技網站《9to5mac》表示，知名 Apple 產品分析師郭明錤最新報告上預測指，Apple 認為Face ID 及螢幕 Touch ID 係兩項可以互補嘅技術，而 Apple 亦希望將兩者合而為一。郭明錤預期，Apple 將會喺2021年為 iPhone 正式引入螢幕 Touch ID，並以超聲波技術作基礎，令 Touch ID 唔會侷限於特定螢幕位置。

目前有唔少 Android 智能手機同時具備咗「面部解鎖」及「螢幕指紋辨識」技術，喺呢方面 Apple 明顯比較保守，但礙於「螢幕指紋辨識」比「實體指紋辨識」技術成熟度仍未足夠，相信呢個亦係點解 iPhone X 及 iPhone XS 未有引入「螢幕指紋辨識」嘅原因。郭明錤亦表示，螢幕 Touch ID 目前有耗能、感應位置、螢幕厚度等問題，Apple 將用上18個月進行研究先可以順利解決。

來源：9to5mac