咩話？一副眼鏡就破解咗 iPhone 嘅 Face ID？日前於美國 Las Vegas 舉辦嘅全球黑客嘅年度盛會 Black Hat USA conference (黑帽大會) 上，有研究人員以一副貼上黑色膠帶眼鏡，及於膠帶上畫上白色點模擬人類眼球，成功解鎖 iPhone 嘅 Face ID。以往配備 Face ID 嘅 iPhone 都需要使用者睜開眼情況下先可以解鎖，萬一有人被黑社會扣留期間，以上述眼鏡解鎖咪好危險！所以大家做人又好，發夢又好，面臨危險前最好就閂咗 Face ID、Touch ID 呢啲生物解鎖喇！

iPhone 嘅 Face ID 一向被稱為目前最安全嘅生物辨識系統之一，不過日前有研究人員於黑帽大會上以眼鏡輕鬆破解。研究人員以一副特別製造嘅眼鏡，鏡片上貼咗黑色膠帶，再於膠帶中間再畫上白點模擬人類眼球，就可以破解 Face ID。

研究人員指出，Face ID 等生物識別技術背後有一項名為「活體檢測」嘅功能，呢種功能用於辨別「真實」或「虛擬」人體特徵，但研究人員發現 Face ID 嘅「活體檢測」喺戴上眼鏡後唔會由眼框區域讀取 3D 資料。

由於 Face ID 係允許用戶戴眼鏡解鎖，根據上述解釋戴眼鏡解鎖就唔會啟動「活體檢測」功能，所以正在睡覺或失去知覺嘅用家，戴上咗特製眼鏡理論上係有可能解鎖配備 Face ID 嘅 iPhone。而為咗封堵呢個漏洞，研究人員建議生物辨識製造商應該為 Face ID 等臉部辨識裝置增加更多身份認證，例如增加影像及聲音合成檢測元素。

來源：9to5mac