如果有條車匙，你會將佢放喺邊？褲袋定係衫袋？早前外國 YouTuber Amie DD 就大膽嘗試新穎方法攜帶車匙，就係將車匙嘅 RFID 晶片直接植入體內，聽到都覺得有啲瘋狂！不過植入 RFID 晶片其實唔係新嘢，同幫寵物打晶片差唔多，但換車係咪要喺體內拎返晶片出嚟？

遊戲及編程界嘅外國 YouTuber Amie DD 最近一條影片中顯示﹐佢將 Tesla 電動車 Model 3 車匙卡中嘅  RFID 晶片取出，並加工成較小形狀封裝於可以注入人體嘅生物聚合物內，再由一位「身體美術家」將晶片安全地植入 Amie DD 右臂上。而喺 Amie DD 進行今次植入前，其實佢左手已經有另一塊植入晶片，係用作控制家門及家居裝置。

將晶片植入體內其實並非新鮮事，早於1998年英國 Coventry University 副校長、控制學教授 Kevin Warwick 1998年就成為全世界首批通過手術於胳膊中植入 RFID 晶片嘅人之一。而 RFID 技術其實類似大家日常用嘅八達通技術，亦早已用於貨運、飛機行李及零售領域。

來源：TechCrunch