一間屋，通常都有男有女一齊住，咁啲嘢理論上都係兩份用呀係咪？但大部份男人都對間屋嘅裝修擺設都係冇Say架，只要老婆/女朋友覺得阻掟，就連你本人嘅存在都可以係錯嘅。咁你話鍾意懷舊街機嘅你，又有咩可能放到部機喺屋企？都得嘅，好似呢張Love Hulten 咖啡檯可能就得啦！

大家或者會對Love Hulten呢個瑞典品牌名有啲印象，因為早年我哋介紹過幾次佢製作、集懷舊木工於懷舊遊戲於一身嘅遊戲機。所以好明顯呢張檯，其實都係一部遊戲機黎。只需要捉住側邊個兩個柄拉出黎，就會見到一個雙打街機掣，更有趣嘅係嗰兩個柄，其實就係個街機掣嘅搖桿，拆出黎裝返上去就用黎打機，打完推返入去佢又變返做張檯。都算係實用與遊戲性兼備呀？