唔少科幻作品中都會出現「量子電腦」呢種科技，而於2019年宣稱自己研發嘅量子電腦達到「量子優越性 (即係運算能力計到啲傳統電腦計好耐都計唔到嘅嘢)」嘅Google就同大家講，「量子電腦」唔再係科幻小說情節，而係即將成為現實！

Google於美國時間星期二舉行「I/O」發佈會，除咗講Android 12嘅新外表、AI發展之外，其中一個宣佈就係會於2029年完結前，開發出「可用嘅量子電腦」，以解決因為傳統電腦運算力不足、目前無法計算嘅全球氣象、人口膨漲以至下一次全球疫情等巨型問題。實際上會做嘅嘢，就係於美國Santa Barbara成立「量子人工智能中心」，入面會有Google首個量子電腦數據中心，量子電腦硬件研發中心等設施，根據《Wall Street Journal》報導，Google會投資數以十億計美金，務求於本年代結束前研發出可用嘅量子電腦。

Google前年聲稱取得「量子優越性」嘅「量子電腦」，其實只係包含少於100個量子位元，而黎緊要研發嘅「可用量子電腦」，目標係100萬個量子位元，可想而知研發難度有幾大。不過Google量子電腦負責人Hartmut Neven就指，佢哋有哂研發路線圖，非常有信心可以於2029年完成目標。

資料來源：The Wall Street Journal