隨住科技發展一日千里，個人飛行裝置唔再遙不可及，相信大家亦睇過唔少噴射背包（Jetpack）嘅片，只有揹住個Jetpack，再戴埋幾個噴射器，就能夠好似Iron Man咁飛上天。最近澳大利亞就有間初創公司整咗件新飛行裝置「Copterpack」，原理同現有嘅Jetpack好唔同，佢哋採用電動旋翼（Rotor）提供升力，並已完成首次試飛。

從片中可以見到，呢部Copterpack結構上同過往嘅人氣飛行裝置Jetpack好唔同，除咗唔係用噴射引擎提供升力之外，亦因為搭配上兩個大旋翼，所以整個裝置顯得更為笨重，睇落就好似一部人肉直升機，不過佢同樣可以安全且平隱飛行。

雖然官方並未說明具體原理，只表示裝置具有「自動調平儀（self-leveling autopilot）」，但據外媒NEW ATLAS猜測，Copterpack用上兩個直徑約90cm嘅電動旋翼，透過碳纖維管連接到一個載有懸掛式電池嘅剛性框架（Rigid-Framed）背包，飛行員用扶手上嘅操控桿控制旋翼轉速及方向，從而做出轉向、固定高度飛行等動作。

有鑑於電池能量密度問題，相信呢部Copterpack飛行時間唔會好長，可能會好似大家細個玩嘅遙控直昇機一樣，充一個鐘電先可以飛15分鐘，不過好處在於用電力驅動，比起現時嘅Jetpack更加環保，同時又可以Free返隻手出嚟，或者第時可以用嚟畀攝影師拍電影、士兵持槍射擊。

資料來源：NEW ATLAS、futurism