隨住科技日益發達，類人型機械人（Humanoid Robot）逐漸走入人類生活，現時呢類機械人主要應用喺簡單社交或打掃工作，但你有冇諗過如果用嚟陪伴老人家會點呢？日前新加坡南洋理工大學研究團隊就用AI機械人同安老院一班老友記玩遊戲，藉此研究能否透過機械人協助老人家社交，減少弧獨感，同時減輕安老院職員工作負擔。

呢部名為「Nadine」嘅AI機械人由南洋理工大學（NTU）量子物理學教授Nadia Magnenat Thalman研發，能夠辨識及回應唔同人嘅說話，並擁有多種臉部表情及肢體動作。日前研究團隊就將「Nadine」帶到當地安老院主持一場Bingo遊戲，仲好貼心咁放慢語速，等每位老友記都可以聽得清楚叫緊咩號碼。研究團隊透過錄影片段發現，相比起同職員玩，一班老友記同「Nadine」玩遊戲嗰陣顯得更開心同專注。Nadia Magnenat Thalman認為今次研究成果對安老服務業有重大幫助，並透露會強化「Nadine」活動及社交能力，希望第時可以幫手處理護理工作，減輕職員工作負擔。

AI機械人「Nadine」以及教授Nadia Magnenat Thalman合照。（圖片截自：straitstimes）

雖然聽落會覺得科技帶領人類進步，但又會唔會只係班老友記第一次見到機械人所以特別專注同興奮呢？至於用AI機械人陪老人家可唔可以減輕佢哋孤獨感，呢方面就交畀各位讀者思考，唔知你哋點睇呢？

資料來源：techxplore