近年IKEA除咗出傢俬之外，亦推出咗唔少智能家居產品，佢哋最近就出咗款新無線充電板「Sjömärke」，能夠安裝喺大部份木枱或膠枱枱底，只要放部電話喺枱面對應位置即可充電，唔使再怕充電板會礙眼或佔據枱面空間。

據IKEA官方介紹，呢款充電板尺寸為3 x 7吋（約7.6 x 17.8cm）、厚1吋（約2.5cm），由塑膠及鋁金屬組成，用戶可以透過螺絲或雙面膠紙安裝喺枱底，枱面對應位置即可用嚟充電話或無線耳機等裝置。另外，官方亦建議充電板安裝喺厚度介乎8mm-22mm嘅非金屬枱，太厚或太薄都可能會充唔到，支援QI 1.2.4規格，提供5W充電功率（充電效能會因材質改變）。

雖然充電功率得5W可以話係非常之慢，但能夠慳位又唔礙眼，都未嘗唔係一個好選擇。「Sjömärke」售價為39.99美元（約$311港幣），預計10月起於美國及其他國家/地區陸續上架，未知香港有冇份，有興趣嘅朋友請密切留意。