經過為期一年公測，SpaceX旗下衛星網絡服務Starlink即將正式營運，最近有外國用戶就帶埋隻碟型天線去到海拔4,300米高山露營，結果發現唔單只能夠正常運作，下載速度更高達370Mbps！

日前Reddit用戶「tuckstruck」去到美國洛磯山脈派克峰附近露營，表示即使身處14,100英尺（約4,300米）嘅派克峰，Starlink依然能夠運作正常，但就冇提及到有幾快。隨後經過網友們詢問，佢就分享咗一項實測數據，表示某晚喺海拔9,300英尺（約2,800米）嘅地方露營，錄得高達370Mbps下載及9.6Mbps上傳速度，延遲大約為34ms~36ms。佢仲話測緊網速嗰陣，老婆正正就係睇緊關於跳舞嘅電視節目。

雖然下載速度令人驚喜，但上傳速度確實有啲低，不過都夠晒用嚟睇片、搵資料、處理簡單公務等等。目前Starlink專用接收天線及路由器一套售價為499美元，Starlink網絡服務月費為99美元，對於網絡基建發達嘅香港嚟講當然唔吸引（同唔知有冇得用），但對於住喺偏遠地區嘅人嚟講簡單係天大喜訊，只要有電同有隻接收天線，理論上去到天涯海角都可以接通全球。