聖誕流流，作為男人最想收到嘅禮物應該係PS5，但咁多位Gentlemen有幾多個真係收到？收唔到係咪因為你冇女朋友？係咪因為你冇錢？錯！係因為佢根本就冇機畀你買！不過據《Wccftech》報導，AMD執行長蘇姿丰時話大家下年就應該買到啦！應該…

其實無論Sony嘅PS5以及Microsoft嘅Xbox SeriesX/S，其出貨量都因為「晶片短缺」而受影響，而兩者嘅晶片供應商都係AMD。據報蘇姿丰於一個電話會議先指遊戲主機市場整體黎講都係「Amazing」嘅，即使目前已經係新一代主機 (PS5及Xbox SeriesX/S) 推出嘅第二年，但需求依然強勁，而AMD亦努力加大晶片產量以滿足需求。佢預期2022年遊戲主機市場增長依然強勁，並且會按過往慣例，於第四年，即2023年達至高峰。換言之，即係大部份都應該於未來兩年買到自己想要嘅主機。

但，蘇姿丰亦提到除產量之外，被疫情影響嘅供應鏈問題依然存在，而且幾乎磨平所有季節性銷售。換言之AMD整到啲晶片出黎，唔代表運到去畀Sony同Microsoft砌到落部機到、就算佢砌到亦唔代表運到黎畀你買。所以，大家都係等下啦。

資料來源：wccftech