怕戴咗口罩人哋睇唔到你有咩表情？最近新創公司Qudi就喺CES2022展出一款面罩，佩戴者能夠透過LED燈表達當下情緒，科技感十足。

據官方介紹，呢款名為「Qudi Mask」嘅面罩，主要由半透明護目鏡及口罩兩大部份組成，搭載199顆LED燈，能做多出種表情及光影效果。而且面罩設有多個模式，例如喺機器人模式下面罩會根據用家說話做出愛心臉、微笑、憤怒等表情，另外當你點頭或搖頭面罩都會對應顯示出YES或NO，如果想再多啲花臣，仲可以透過專用Apps去設定鍾意嘅效果。

值得一提嘅係，官方並冇表明面罩細菌過濾效率達到咩標準，所以都唔知係咪具備防疫功能，如果用家想安心啲可能就要喺入面戴多個外科口罩喇。不過就咁睇個罩確實幾有趣，戴住去Party應該會成為全場焦點！