仲記得去年10月我哋就同大家報導過，有個美國男子詐騙政府提供嘅疫情中小企救濟貸款，但結果就拎啲錢去買咗一張Pokemon卡嘅事嗎？近日事情終於有結果——法庭正式裁定Vinath Oudomsine有罪，而且重罰！

卻說Vinath Oudomsine於2020年謊報自己有間養緊10名員工、年收達23.5萬美金 (約HK$180萬) 嘅公司，從而8.5萬美金 (約HK$66萬) 政府提供嘅疫情中小企救濟貸款，然後就拎咗其中5.8萬美金 (約HK$45萬) 去買一張Pokemon卡，結果被有關當局捉到，被控以一項電匯詐騙罪名。而日前喬治亞州法院正式判Vinath Oudomsine有罪，而且罰則都頗為嚴重，先係要入獄3年，出獄後頭3年都係假釋、然後再罰$1萬美金，最後當然係要全數還返嗰8.5萬美金貸款。我唔知佢張Pokemon卡最後有冇賺，但條數點睇都係蝕到入肉。

Vinath Oudomsine

負責此案嘅亞特蘭大FBI分局發言人Philip Wislar指，政府發放嘅貸款係希望協助中小企渡過疫情難關，「唔係畀人用黎買啲唔等使嘅收藏品。呢次判決證明FBI係銳意針對嗰啲濫用納稅人金錢、損害有需要嘅人利益嘅罪犯。」

而負責判決嘅法官David Estes亦指，「好似Oudomsine呢類騙子就如燈蛾撲火一樣利用貸款計劃黎益自己，我們會與其他執政伙伴一齊令佢哋為自己嘅貪婪負責。」