早兩個星期，世界首富Elon Musk公開表示向Twitter提出以430億美金全面收購Twitter。而據報，Twitter十一位董事局成員於美國時間週日決定與Elon Musk正式討論收購事宜。

雖然曾經有消息指出，Twitter希望以「毒丸計劃」增加Elon Musk收購成本，以抵抗其私有化計劃。但據《Reuters》報導，有傳媒爆出Elon Musk獲得465億美金 (其中210億係Tesla股票、125億係借嘅，另外130億由摩根史丹利等銀行提供) 作為收購資本嘅詳情，加上Elon Musk親自1接觸過部份Twitter股東後，股東們對於Elon Musk嘅提案非常感興趣，主動要求董事會要與Elon Musk進行商討，以免錯失機會。

但Twitter與Elon Musk開始商討，並唔代表收購一定能夠成事。《Reuters》指出Elon Musk提出嘅「每股54.2美金」、而且係「最後及最佳報價」將會成為談判嘅難題之一，Twitter方面可能用其他辦法尋求最大利益，例如公開招標以期望逼使Elon Musk提高報價，又或向Elon Musk提出某種賠償條款，以防收購失敗。Twitter會向美國證監會查詢，目前是否有進行針對Elon Musk嘅調查，以免交易因調查而受影響；同時Twitter亦要向其他主要市場嘅監管機構了解會否反對收購。