隨住網購越黎越發達，加上過去兩年經常冇街出，相信唔少人都已經習慣咗網上購物。但對於某啲產品，例如係衫褲鞋襪等要試過上身先知啱唔啱嘅嘢，網購有時就要面臨買完返黎先知唔啱身、唔啱心水嘅問題。不過睇黎呢個問題好快就會得到解決，因為美國Amazon日前推出「虛擬試鞋服務」！

圖片：截圖自Amazon

所謂「虛擬試鞋」，其實就係Amazon iOS App上新加嘅功能，顧客喺揀好一對鞋後，就可以開啟虛擬試鞋功能，再將手機嘅鏡頭對住自己對腳，佢就會用AR技術模擬出你著咗對鞋之後嘅模樣，用家亦可以郁動對腳去睇清楚每一個角度，以及選擇其他顏色，一眼睇得清揀邊對鞋好啦。

目前呢個「Virtual Try-On」功能，只限北美嘅Amazon用家先可以用到，亦只限「鞋」呢個產品，但可以想像呢個技術再發展落去，或者有日連衫褲都可以虛擬試著，咁上網買衫就方便得多啦。

資料來源：Amazon