Meta旗下所有服務目前都係冇一個真正嘅「客戶服務」功能，萬一你喺使用上遇上任何問題，就只可以於佢個類似「Q&A」嘅支援頁面自己搵答案，就算搵唔到都唔會有電話、Email甚至線上對話可以去搵個「真人」黎問。雖然對於普通Facebook、IG用家可能冇咩影響，但對於一眾靠經營專頁搵食嘅「小編」黎講，遇到問題但求助無援真係煩到嘔。而喺Facebook創立18年後，佢哋終於會成立客戶服務部！

據《Bloomberg》引述Meta嘅監管副主席Brent Harris，Meta內部正「花好多時間」改善客戶服務，而其中一個方向，就係可能擴展去年自開始有、而且只限英語國家嘅「線上客服」功能。據報Meta之所以會改變18年黎嘅「無客服」方針，係因為去年Meta就「自動審核內容」成立咗個獨立調查小組，結果發現有近100萬名用家提出過上訴 (即係反對Meta刪文)，所以決心改善客戶服務，令用家更容易得到支援。

目前你用Facebook時遇到任何問題，都有好高機率會迷失於呢個支援頁面

由於Meta沒有回應傳媒嘅進一步查詢，所以目前唔知所謂嘅「客戶服務」會有啲咩。不過考慮到無論Facebook、IG定WhatsApp目前基本上都係「冇客戶服務」，佢是但求其整啲嘢出黎都已經係一個進步。

資料來源：Bloomberg