PS5推出足足兩年，但到依家仲一直缺貨，想買機依然要抽獎，再唔係就要食炒價。不過根據外媒報導，未來可能會出現一個唔買主機，但都可以玩到PS5嘅方法——就係買架電動車。

Sony Honda Mobility發佈嘅汽車概念圖

卻說Sony及Honda於九月時宣佈聯合組成新公司Sony Honda Mobility，預計就係會推出電動車。雖然目前連個品牌名都未有，但新公司嘅主席 Izumi Kawanishi日前接受《Financial Times》訪問時，就透露佢哋嘅電動車會圍繞「Sony的強項」，即音樂、電影以及遊戲而設計，並指出呢點就係佢哋比起Tesla更優勝嘅地方。佢甚至直言，「技術上係可以將PS5融入部車到」，換言之品牌未來推出嘅電動車，好可能係可以打機嘅。

不過呢個「未來」就可能有啲遠。事關公司另一名高層Yasuhide Mizuno透露，品牌預計最快都要2025年先可以喺北美推出第一款電車，屆時PS5都已經係一部出咗5年嘅「舊機」。