有留意開機械人科技嘅話，應該都對Boston Dynamics呢間美國公司唔陌生，最近佢哋就出咗條新片展示最新研發進度，可以見到機械人已經識得拎重嘢行樓梯，仲識得遞工具包畀工人！

Boston Dynamics今日發布一條名為「Atlas Gets a Grip」嘅短片，從片中可以見到機械人Atlas首先用機械手臂夾起一執木板幫自己搭橋，然後拎起工具包經過由木箱組成嘅樓梯行到(或者叫跳？)棚架上，並將工具包掉畀台上嘅工人，最後翻一個筋斗跳回地面，整個過程行雲流水，身手敏捷過唔少真人。

據了解，以往Atlas機械人手部只係一個黑色波波，今次終於有返隻「手」可以拎起或放低重物，唔知幾時可以廣泛應用喺工作上呢？

Atlas以前係冇「手」，只得一個黑色波波。