隨住AI聊天機械人ChatGPT爆紅，人工智能生成內容（AIGC）火速成為科技界當紅炸子雞，吸引各大科企紛紛布局。最近Google就宣布旗下雲端辦公套件Google Workspace引入生成式AI，協助用家寫Email、文章、試算表，甚至投影片簡報。

據官方介紹，用家只要喺「Google文件」或「Gmail」簡單輸入想寫嘅主題（e.g. 活動簡介、徵才廣告、回覆郵件），AI就會立即生成一份草稿，並能夠按用家需要調整合適風格及語氣，例如寫求職信或商業洽談等正式信件時，只要撳一撳「Formalize」，AI就會自動幫手執返好啲文法同語氣，為用家節省大量寫作時間。

除咗文字方面，全新AI功能亦喺「Google 簡報」及「Google 試算表」等常用Google Workspace軟件大派用場，例如自動生成簡報圖像、聲音及影片；於試算表自動產生公式及分析數據等等。上述新功能將於3月起率先在美國推出試用，及後再擴展到更多國家並支援更多語言。