美國德州政府早前通過名為「賦權家長保護網上兒童（Securing Children Online Through Parental Empowerment，SCOPE）」法案，並預計於9月1日正式實施。不過美國聯邦法院於8月30日對法案頒佈部份禁令，令SCOPE成為繼加州、阿肯薩斯州及墨西西比州外，第四個有同類法案被禁執行嘅州份。

「如何避免兒童於網上接觸不良資訊」乃係近年美國嘅重要議題之一，故多個州份都分別推出相應法案。不同州份嘅法案雖然略有不同，但大致上都係要求網上平台經營者——例如各大社交平台，又或Pornhub等成人網站——需要特別處理未成年使用者，例如唔可以收集佢哋嘅用戶資訊、唔可以提供針對性廣告、含有成人資訊嘅網站必需驗證使用者年齡，又或透過平台付費時必須先獲家長同意等。

而SCOPE較為特別嘅，係佢明文寫明網上平台必須「避免未成年人接觸有害資訊。包括宣揚或美化自殺、自殘、藥物濫用及誘拐兒童（Grooming）等話題」，換言之平台必須為未成年人過濾呢類型內容。

而正正就係「過濾內容」呢段，令聯邦法官Robert Pitman對法案頒下部份禁令。法官指出「宣揚」、「美化」、「藥物濫用」、「誘拐兒童」呢啲字眼涵蓋嘅範圍非常大，而且其定義經常隨政治氣氛而改變，但法案冇對呢啲字眼作出準確定義，「到咩地步酒精會屬於『藥物濫用』？激進嘅節食又幾時先算係『飲食障礙』？」法官亦提到呢條禁令「於嘗試阻止未成年人接觸有害資訊時，亦阻礙佢哋參與網上嘅民主意見交流。」

值得注意嘅係，今次法庭頒下禁令係因為有科技組織控告SCOPE違憲，而聯邦法庭接納此次案件。換言之SCOPE——或其他同類法案——最終能夠「全身而過」，係要睇各個案件嘅最終結果。目前為止一切都係未知之數。

資料來源：The Verge