已經成為公開秘密嘅PS5 Pro終於發佈！據PlaystationHK Facebook專頁於今早發佈嘅帖文，PS5 Pro香港售價為HK$5,780，9月26日起接受預訂、11月7日正式發售。

而Sony官方YouTube亦同步發佈兩條PS5 Pro嘅影片。一條係充滿特效、連部機都唔多出鏡嘅PS5 Pro預告；但另一條由Playstation設計師Mark Cerny主持嘅技術規格展示影片，當中就頗為詳盡地介紹咗新機嘅新功能。

影片中提到PS5雖然機能強大，但仍受限於機能，令玩家只能於著重畫面但只有30fps嘅「像真模式」及犧牲畫面但有60fps嘅「效能模式」中二選其中。而PS5 Pro就加入更大、更快嘅GPU，令渲染速度加快45%；同時改善光線追蹤嘅算法，令速度提升兩至三倍；另外仲加入一個叫Playstation Spectral Super Resolution嘅技術，以AI填補像素之間嘅空隙，達至「升頻（Upscaling）」嘅效果。影片中亦演示三者結合之下，如《The Last of Us 2》等遊戲可以維持「像真模式」嘅畫面質素，但又維持60fps流暢畫面。

但值得一提嘅係，網民對於PS5 Pro相當不滿，而個價錢就更加被鬧到體無完膚。例如Mark Cerny主持影片下方就有留言指「$700美金買部冇底座仲冇光碟機嘅主機係痴線」，仲獲得2.5萬個讚好；有人更指出PS5 Pro嘅推出令佢諗起當年嘅PS3，「Sony要被人打鑊甘嘅先會識得腳踏實地做人。」